4 fevral 1888 — frau A., tibbi cəmiyyət qalmaqalı və Meynert barədə

Xahiş edirəm bu məktubu geriyə doğru tarixləndirəsiniz; mən onu çoxdan yazmalı idim, ancaq iş, yorğunluq və balaca qızımla oyunlar buna imkan vermirdi. Əvvəlcə sizə frau A. barədə bəzi xəbərləri çatdırmalıyam; onun bacısı hazırda sizinlədir. Hal kifayət qədər sadə çıxdı, alimlərin xroniki kəllə içi hiperemiyası (beyin qan dolğunluğu — tərc.) adlandırdığı adi serebral nevrasteniya. O, getdikcə daha aydın olurdu, qalvanizasiya və su müalicəsi zamanı sabit yaxşılaşma müşahidə olunurdu; mən artıq düşünürdüm ki, əzələ məşqlərinin köməyi ilə onu tam sağalda biləcəyəm — ancaq elə burada gözlənilməz bir şey baş verdi: vaxtı çatanda aybaşısı başlamadı, bundan az sonra isə ona pis oldu; ikinci aybaşı zamanı da müalicə dayandırıldı.

Onun indiki vəziyyəti çox yaxşı olmasa da, yaxşıya ümid etməyə imkan verir. Öz tərəfimdən müalicəni davam etdirmək istərdim, ancaq qadının və bütün ailəsinin narahatlığına, habelə Xrobakın rəyinə qarşı çıxmaq üçün müalicənin uğuruna kifayət qədər əmin deyiləm. Nəticədə özümü belə bir peyğəmbərliklə bağladım ki, hər şey öz-özünə dördüncü aya qədər yoluna düşəcək və indi bu barədə güclü şübhələrimi sirr kimi saxlayıram. Sizin hamiləliyin belə nevrasteniyaya təsiri ilə bağlı hansısa təcrübəniz olubmu? Ola bilsin ki, bu yeni vətəndaşa görə qismən məsuliyyət daşıyıram. Bir dəfə xəstə qadının yanında, heç də təsadüfən deyil, saxlanılan cinsi əlaqənin [coitus reservatus] zərəri barədə kəskin danışmışdım.

Ola bilsin ki, bu məsələdə yanılıram. Əziz dost, başqa xəbərlər o qədər də çox deyil. Mənim balaca Matildam sağ-salamat böyüyür və bizə çoxlu sevinc və gülüş bəxş edir. Bildiyiniz kimi, o qədər də əhəmiyyətli olmayan praktikam son vaxtlar Şarkonun iki adı sayəsində bir qədər genişlənir. Fiakr baha başa gəlir, səfərlər və insanları bir şeyə inandırmaq, ya da bir şeydən daşındırmaq — axı mənim peşəm elə bundan ibarətdir — məndən [yazı] işi üçün ən yaxşı vaxtı alır. Baş-beyin anatomiyası hələ də olduğu yerdədir, ancaq histeriya davam edir və ilk qaralama artıq tamamlanıb. Şərəfli Xristianlıq özünü son dərəcə ədəbsiz aparır. Dünən tibbi cəmiyyətdə böyük qalmaqal oldu.

Həkimlərin. Onlar bizi zorla yeni həftəlik jurnala abunə etmək istəyirdilər — işləməyi çoxdan unutmuş bir neçə saray müşavirinin təmizlənmiş, dəqiq və xristian mövqeyini müdafiə etməli olan jurnala. Təbii ki, onlar bunu həyata keçirdilər; məndə çıxmaq üçün böyük həvəs var. Mən son dərəcə lazımsız bir konsultasiyaya — Meynertin yanına tələsməliyəm. Özünüzü qoruyun və qoy bir bazar günü sizdən bir neçə söz eşidim. Sizə sadiq
Dr. Ziqm. Freyd.